ក្រុងហ្សឺណែវៈ អាមេរិក
បាននិយាយកាលពីថ្ងៃសៅរ៍ថា វាគឺជា«កង្វល់ដ៏ជ្រាលជ្រៅ
និងបានតាំងចិត្តការពារជប៉ុន បន្ទាប់ពីចិនបានប្រកាសពីតំបន់ហោះហើរមួយ នៅ
សមុទ្រចិនខាងកើត ដែលមានបញ្ចូលទាំងប្រជុំកោះមានជម្លោះផងដែរ។នៅក្នុងទង្វើមួយ ដែលជប៉ុន ជាសម្ព័ន្ធមិត្តអាមេរិកបានចាត់ទុកថា«មានគ្រោះថ្នាក់បំផុត»នោះ ចិនបាននិយាយថា ខ្លួនកំពុងបង្កើត«តំបន់អត្តសញ្ញាណការពារ ដែនអាកាស» លើប្រជុំកោះដែលគ្រប់គ្រងដោយក្រុងតូក្យូដើម្បី«ការពារប្រឆាំង នឹងការគំរាមកំហែងផ្លូវអាកាសជាសក្តានុពល»។
នៅក្នុងសេចក្ដី ថ្លែងការណ៍ស្រដៀងគ្នា រដ្ឋមន្ត្រីការបរទេសអាមេរិក លោក ចន ឃើរី និងរដ្ឋមន្ត្រីការពារជាតិ លោកឆាក់ ហាហ្គែល បានថ្លែងថា អាមេរិកមាន«កង្វល់យ៉ាងខ្លាំង»អំពីទង្វើចិនដែលបានបញ្ជូន យន្តហោះការពារអាកាសដើម្បីធ្វើបេសកកម្មល្បាតនៅតំបន់ដែលខ្លួនបាន ប្រកាសថ្មីៗនោះ។
លោកឃើរី បានថ្លែងថា៖ «ទង្វើឯកតោភាគីនេះ បង្កើតការប៉ុនប៉ងមួយដើម្បីផ្លាស់ប្ដូរស្ថានភាពដើមនៅសមុទ្រចិនខាងកើត»។
ថ្លែង ពីក្រុងហ្សឺណែវ ដែលលោក កំពុងចូលរួមក្នុងកិច្ចពិភាក្សាស្ដីពីការឈានដល់កិច្ចព្រមព្រៀង មួយជាមួយអ៊ីរ៉ង់លើកម្មវិធីនុយក្លេអ៊ែរ អ្នកការទូតកំពូលអាមេរិករូបនេះបានថ្លែងថា៖ «ទង្វើកើនឡើងនេះនឹងគ្រាន់តែបង្កើនភាពតានតឹងនៅក្នុងតំបន់ និងបង្កើតហានិភ័យនៃគ្រោះថ្នាក់មួយប៉ុណ្ណោះ»។
លោកឃើរី បានថ្លែងថា អាមេរិក បានជំរុញឲ្យចិន«ប្រកាន់ការប្រុងប្រយ័ត្ននិងការអត់ធ្មត់» និងបានព្រមានក្រុងប៉េកាំងប្រឆាំងនឹងការ បង្កើតតំបន់ថ្មីរបស់ខ្លួននេះ។
លោកឃើរី បានថ្លែងថា៖«យើងស្នើឲ្យចិន កុំគំរាមកំហែងចាត់វិធានការប្រឆាំងយន្តហោះ ដែលមិនបង្ហាញអត្តសញ្ញាណខ្លួនឬក៏មិនគោរពបញ្ជាក្រុងប៉េកាំង»។
លោកហាហ្គែល បានបញ្ជាក់ជាថ្មីថា ប្រជុំកោះសេនកាគូដែលគ្រប់គ្រងដោយជប៉ុន ដែលចិនទាមទារ និងហៅថាកោះឌាវយូ បានស្ថិតនៅក្រោមសន្ធិសញ្ញាសន្តិសុខអាមេរិក-ជប៉ុន ដែលមានន័យថា ក្រុងវ៉ាស៊ីនតោន នឹងការពារសម្ព័ន្ធមិត្តខ្លួន ក្រុងតូក្យូបើសិនតំបន់នោះត្រូវគេវាយប្រហារ។
លោកហាហ្គែល បានថ្លែងថា៖« យើងមានការពិគ្រោះយ៉ាងល្អិតល្អន់ជាមួយក្រុមសម្ព័ន្ធមិត្ត និងដៃគូនៅក្នុងតំបន់ រួមទាំងជប៉ុនផងដែរ។ យើងនៅតែប្រកាន់ភ្ជាប់នៅក្នុងការប្ដេជ្ញាចិត្តចំពោះក្រុម សម្ព័ន្ធមិត្ត និងក្រុមដៃគូយើង»។
រដ្ឋមន្ត្រីការពារជាតិរូប នេះ បានបញ្ជាក់ថា អាមរិកដែលមានទាហានជាង៧០០០០នាក់ឈរជើងនៅជប៉ុន និងកូរ៉េខាងត្បូងនឹងមិនគោរពតាមការប្រកាសពីការគ្រប់គ្រងលើ តំបន់នោះរបស់ចិនទេ។
លោកហាហ្គែល បានថ្លែងថា៖«ការប្រកាស របស់ចិន ក្នុងវិធីណាក៏ដោយនឹងមិនមានផ្លាស់ប្ដូររបៀប ដែលអាមេរិកធ្វើប្រតិបត្តិការយោធានៅតំបន់ឡើយ»៕
ទាំងស្រុងពី ភ្នំពេញប៉ុស្ដិ
0 comments:
Post a Comment