ភូមា និង បង់ក្លាដែស ប្តេជ្ញាពង្រឹងកិច្ច សហប្រតិបត្តិការ បន្ទាប់ពីការប្រឈម មុខដាក់គ្នា

យ៉ាងហ្គូន៖ គេហទំព័រព័ត៌មាន Channel News Asia ចេញផ្សាយថ្ងៃទី១២ ខែមិថុនា ឆ្នាំ២០១៤ បានឲ្យដឹងថា ប្រទេសភូមា និងបង់ក្លាដែស ប្តេជ្ញាពង្រឹងការរក្សាសន្តិសុខ និងលុបបំបាត់នូវបទល្មើស និងក្រុមប្រដាប់អាវុធខុស ច្បាប់ បន្ទាប់ពីមានហេតុការណ៍ប្រឈម មុខដាក់គ្នានៅតាមបន្ទាត់ព្រំដែន នៃប្រទេសទាំងពីរ។ ប្រទេសជិតខាងទាំងពីរ នឹងចាត់វិធានការ ដើម្បីបញ្ចៀសកុំឲ្យហេតុការណ៍អាក្រក់ ដែលធ្លាប់កើតឡើងកាលពីខែ ឧសភាកន្លងទៅ កើតមានសាជាថ្មី ដោយពេលនោះ មានការបាញ់បោះគ្នារវាងកងកម្លាំងរក្សាសន្តិសុខរវាងប្រទេស ទាំងពីរ។ នេះបើយោងតាមការលើកឡើងរបស់ប៉ូលីសប្រទេសភូមា និងឆ្មាំការពារតាមបន្ទាត់ព្រំដែន របស់ប្រទេស បង់ក្លាដែស។ គួររំលឹកផងដែរថា ភាពវឹកវរបានកើតមានឡើង ដោយភាគីភូមាជាអ្នកផ្តើមមុន។ ក្រុមបះបោរ ដែលមានទំនាក់ ទំនងជាមួយជនជាតិភាគតិចម៉ូស្លីម Rohingya បានចាប់ផ្តើមប្រតិបត្តិការបាញ់ប្រហារនៅក្នុងតំបន់ជាប់បន្ទាត់ ព្រំដែន។ តាមរបាយការណ៍ពីភ្នាក់ងារជនភៀសខ្លួនរបស់អង្គការសហប្រជាជាតិ ដែលហៅកាត់ថា UNHCR នាសប្តាហ៍នេះ បានបញ្ជាក់ថា គិតត្រឹមរយៈពេលពីរឆ្នាំចុងក្រោយ មានមនុស្សប្រមាណជា ៨៦.០០០នាក់ បានធ្វើដំណើរតាមផ្លូវ ទឹកចាកចេញពីឈូងសមុទ្រ បេងហ្គាល ដើម្បីគេចចេញពីការបាញ់ប្រហារគ្នានេះ៕ ប្រភពមកពី៖ ដើមអម្ពិល